خارج الصندوق
بدل ما احكي واتكلم واقول واعيد ومن الاخر ...........امل البلد دي اننا نفكر خارج الصندوق

لان كل حاجة مرصودة وكل التكتيكات معروفة العواقب وكل الخطط مدروسة, والقيم المنهارة علينا اعادة بنائها بالتفكير خارج الصندوق.
يعني مثلا قبل ما نعمل قانون للتحرش بعد قانون خدش الحياء وقانون الاغتصاب , نفعل قانوين في غاية الاهمية, وكمان نجعل لتفسير ذلك القانونين اهمية في توسيع القواعد الشارحة لتقييد ارتكاب تلك الافعال.

القانونين هم قانون 269 مكرر من قانون العقوبات "يعاقب بالحبس مدة لا تزيد على شهر كل من وجد في طريق عام او مطروق يحرض المارة على الفسق باشارات او افعال ."
يعني التلفت والاشارات والطرقعة باللبان والتصرفات غير الاخلاقية المنفلة المكشوفة والتلامس في المشي والمشي بطريقة ملفتة ولبس الهدوم المفتوحة المبينة للهدوم الداخلية او الملتصقة كاملة في اماكن مستفزة مثيرة للغرائز, لاب
ان يكرز عليها القانون قبل ان يصدر قانون التحرش الجنسي, بل علينا ان نعترف ان قانون التحرش الجنسي منقوصا اذا لم يشتمل على تفعيل هذا القانون معه .
المادة الثانية المهمة هي 278 من قانون العقوبات " كل من فعل علانية فعلا فاضحا مخلا بالخياء يعاقب بالحبس مدة لا تزيد على سنة او بغرامة لا تتجاوز 300 جنيها." هذه المادة ايضا علينا التوسع في تفعيلها وعلينا ان نركز الا يصدر قانون التحرش الا معها ايضا بتفسيرتها التي تلزم في النهاية بوضع حد ادني للنفلات الاخلاقي في الملابس في الشارع , (ده حتى الرقصات ليهم حد ادني للزي ) .
طبعا انا عارف ان تطبيقه صعب بس في نفس الوقت لو حصل لوحدة الهدوم الداخلية لها مكشوفة (سواء اللي فوق او اللي تحت ) عمدا وتم التحرش بها لا بد ان يراعى ذلك في القانون , والا يصدر القانون في صيغة قد لا تحقق العدالة المطلوبة من القوانين .

معلش لو صدمت حد بالمقالة دي بس الحقيقة انا بفكر خارج الصندوق
يعني انا ضد المتحرشين جدا جدا جدا , بس في نفس الوقت انا ضد كمان ان البنات والسيدات يمشوا في الشارع في عرض للملابس الداخلية وبعدين نقول الله اصل الشباب انحدرت اخلاقه , لو عايزين العدل اللي املفروض اننا كلنا نسعى اليه , فلازم نقول ان الملابس الملتصقة وظهور الملابس الداخلية والحركات السيئة السمعة والتصرفات الخادشة للحياء كلها لا بد ان يسن قانون (الحقيقة هو مسنون بس لازم نفعله) ايضا لكي نطبق العدل با اهل العدل ,

(الخلاط بين الدين والسياسة (الحزب الوطني
ماسبش حاجة الحزب الوطني وماعملهاش الله..... (زي خيري شلبي كده)0000

في فرق كبير اوي بين فكرة السياسة المستقاة من الدين ايا كان, والسياسة الاسلامية , والتي هي اساس مهم في التشريع الاسلامي اصوله ممتدة عبر التشريع كله وليس محددة في نصوص بل في اكثر من موضع ولاكثر من مبدء, و فكرة خلط الدين بالسياسة كما يؤديها الحزب الوطني بقوة واقتدار, وثالث القرناء الحكم الديني الثيوقراطي كالحكم في ايران و الحكم المسيحي في القرون الوسطى. مش وقتوا خالص اني اتكلم عن النوعييين التانينن لان مكن برضو اعملهم مقالات منفصلة........ بس كلوا كوم والخلاط اللي اسمه الحزب الوطني ده كوم تاني.
الحزب بعمل حاجة ظريفة اوي....لما لقوا ان الاخوان المسلمين في طريق دعوتهم الناس بتثق فيهم (بغض النظر هل هم استغلوا ذلك في السياسة او ربنا اكرمهم ...والطبيعي انوي يحصل .. المهم ..) وبتديهم اصوانهم في الانتخابات وعلشان يدارو على ضعفهم وانهم قد كده مش قادرين على قوتهم خصوصا في القرى والنجوع والبلاد الطيبة, اللي ناسها عاندهم خلط كبير بين حياتهم الاجتماعية والاساس الديني فيه والحياة السياسية , تفتق ذهنهم عن فكرين غراب جدا ( غراب اسود على دماغهم) اول هذه الافكار قال بما ان المصريين بيحبوا الاسلام والعبادة ومهما حصل التدين في حياتهم شيئ اساسي طب بلاش الاسلام من وجهة نظر الاخوان..... احنا ندي فرصة للسلفيينن (الوهابيين) علشان يشاركوهم في التعبير عن الاسلام ونشجهعم جدا للشغل وكلدهخياخد من اتباع الاخوان ... والفكرة المبتكرة دي كلها فوايد للحزب والرئاسة ... عدوا معايا بقى

اولا : السلفيين او الوهابيين زي ماحنا شايفين في السعودية مالهمش دعوة بالانتخابات او بالحكم او مين يحكم او مايحكمش , وحتى لو ليهم ماعندهمش مانع يكونوا قطيع غنم يورثوا جيل بعد جيل ومن اخ الى اخ الى ابن الى اخ....مادام الدين مقام والامير يحكم بشرع الله مافيش مشاكل ومدام ربنا مدينا على قد نيتنا... فطز في الديمقراطية خصوصا انها سيئة السمعة وشاكلها كده غير شرعية , والشورى تقام بين اهل الحل والعقد... وكفى الله المسلمين شر الاحزاب والحكم...

ثانيا : السلفيين او الوهابيين ضد فكرة الخروج على الحاكم اصلا , ولا يؤمنوا بالمظاهرات واهي فرصة نضرب يها المصريين ببعض ونخلي في اعتراضات جمة على المظاهرات , ونخليهم ننسى فكرة مشروعية الجهر بالسؤال لمن ظلم.

ثالثا السلفيين عبدة لظاهرالدين ولجوهر ايماني متصل بالتفاصيل وسهل جدا شغل المجتمع الوهابي , بفتاوي لامور في الدين تقام علها الموائد والنقاشات والساعات النقاشية للدوار في دوامات من الفراغ غير المنتج, وغض الطرف عن صلاح او فساد عموم المجتمع و الانشغال عن ذلك بما لا يصل الى التاثير وتهديد الجالس فوق العرش.

رابعا : السلفين اصلان مستانسيين وتحت السيطرة ومنكسرين اليومين دول لاتهامهم بالارهاب ازا فكروا مجرد تفكير بالتحدث لا العمل بالسياسة .

خامسا السلفيين او الوهابين يضمنوا كفالة لبعضهم البعض و زكواتهم تذهب الى فقرائهم فيزيح ذلك فوق كاهل الحكومة اي تقصير ممكن اتجاه شريحة من المجتمع .

شفتوا بقى النظام بيفكر ازاي ...
كفاية كده علشان اروح للنقطة التانية

تفتق ذهن خلااااااطط الحزب الوطني انهم هم كمان يشتغلوا بالدين ويرشحوا شيوخ منهم (يا أما يشتروهم او يشغلوهم او يقنعوهم ازاي ماعرفش) المهم انهم يكونوا في داخل الحزب الوطني, ويعملوالجنة الللشؤون الدينية لكي يسيطروا على توغل الاخوان , تخيلوا , .
طبعا ذلك التوغل من قبل الحزب الوطني ليس اكيد عن قناعة انما عن تقليد اعمي للاخوان.... فبيتبرعوا مثل الاخوان , ويشاهدوا يصلوا في المساجد مثلهم, ويشاركوا في المناسبات الدينية باسم الرب مثل الاخوان , قال احنا ناقصيين , وبعدين يتهموا الاخوان انهم هم اللي بيخلطوا بين الدين والسياسة , لو كان الاخوان فيهم وليس كلهم عن قناعة قرب منهم ساعات بيخلط بين السياسة والدين بالطريقة دي , ( اكيد اللي يعرفني مؤمن اني مش اخوان نهائي واكيد ماحدش حايزايد عليا ), فاكيد ان الحزب الوطني بافعاله دي خلااااااااااااط مولينكس .

وده طبعا بدون الاعتبار لاي مصالح لمصر وللهوية المصرية , طز في مصر واللي في مصر المهم البقاء ع الكرسي,
طز في الدين اصلان ايا كان مادام ده حايخليني قاعد ومتبت ,,,,

طبعا ماحدش حايكون مقتنع ان الحزب مشغل الخلاط ده علشان الاسلام اكيد, او علشان الدين, لان الاصل غلاب والطبع بيغلب التطبع واصل الحزب وممارساته مش كده نهائي.

بس خلينا نجاوب على سؤال افتراضي انا زعلان ليه,
اولا وهو االسلام الوسطي ذو الجذور المصرية المتفتحة على الاخرسئ ولا علشان الاخوان المسلمين هم من يدعون اليه, وبعدين الاسلام الوسطي بقى بغض النظر عن مين اللي بيدعموا وبينشروا في مصر اصلان كائن بقوة وجود الازهر يعني وسطية المصريين في التعامل مالهاش دعوة بوسطية الاخوان بل على العكس السلسة الذهبية الافعاني عبده رضا البنا الغزالي ..(يارب تدوم دايما) ليس لها صلة بالاخوان بقدر مالها صلة بالازهر فلماذا لم يتفتق ذهن جهابزة الحزب في التركيز على تقوية الازهر بدلا من الوهابية.
الغباء المتاصل ... ان الفكر الاسلامي الوسطي المصري كان احد دعائم وعوامل الاتزان في مصر والاستقرار لان دائما ماكان يرحب بالاخر وان يكون محتويا له, ولذا فهذ الفكر الوسطي اهم وافيد لمصر من الفكر البدوي الوهابي المعتمد على توحد القبيلة كلها تحت راية واحدة وان القيبلة كلها تعتمد اساس ديني وشرعي واحد .......

حاقول ايه
والكلام كتير اوي ,,,,,,,

يعمر بيت خيري شلبي بالعكس

مش قادر اقول بالتصريح اللهي يخ,,,,, اصلي بجد بحبه وميت فيه بعدين ربنا خربه أو صلحه هو أكيد مش حايكتب أكتر ماكتب وخرب بيه بيوتنا كلنا.

كلام خيري لما تقراء مش ممكن تحس الا أن الدنيا حواليك تحولت الى مايكتب, وان كان مايكتبه في قرية فانت ستتحول الى قاعد على مصاطب ولغة الحديث والحوار بل المواضيع ستتحول الى شي اخر غير اللي انت عايشه من سنين, ولو كتب عن وسط البلد حاتسمع صوت السريحة من الشبابيك وتحس الن الدنيا زحمة والناس قريبة من بعض ويمكن تمد ايدك تسلم على اللي جنبك تبط في الحيط , ولو اتنقل بيك في الرواية بين اكتر من مكان قول على نفسك السلام, حاتخلص الرواية وأنت منهك انهاك من سافر عدة ليالي بين البلدان والنجوع والقاهرة او الاسكندرية او البخيرة والصعيد الجواني واللي مش جواني, حاتكبر معاه في السن او حاتصغر وحاتقابل عصر الملك وحاتحب جمال معاه رغم تحفظك عليه وحاتكره السادات ومبارك حتى لو ما صرحش وحاتشتغل اكيد صحفي او طالب او سريح الى ان تصل الى عضو مجلس شعب , ويا سلام لو دخلت السجن معاه او انضربت علقة سخنة في شارع او غرزة, علشان كده دايما الرواية وانت بتقراها تحس ان الدنيا ضلمة وصعب تقراها الصبح – انا حاولت كتير – بس استمتعت اكتر بالليل- ,
كل ده ربنا مايخربش بيته علشانه، انما كلامه عن الحشيش والغرز .... ده كوم تاني
اييييييييييه ده , ماشفتش واحد بيتكلم عن الحشيش بالحب ده والتحشيش زيه كده , لدرجة انو بيقلب كل الحاجات الوحشة اللي ممكن الواحد يواجهها الى محسنات بديعية ووالى امور لزوم التعمير والتزبيط والروقان , حتى نوعيات الناس, من الرئيس الى الوزير وانت نازل كانوا بيحششوا , وكأن الحشيش ده فعل عادي طبيعي زي دخول الحمام - وهو في حد مش بيدخل الحمام رجال او ستات كبار او صغار - فعل التحشيش لا يحلى الا في الغرز واجهل رواية او قصة وده حدود معرفتي بنهر كتابات خيري شلبي لا يخلوا من فعل الشرب او مشهد الغرزة مهما كانت قصته او روايته ومسرح احداثها او موضوعها , انا سااعت بخاف يتكلم عن فترة قريش والفتوح الاسلامية في مصر لانه اكيد كان حايوصف ازاي قريش لما اتفقوا على سيدنا محمد كانوا بيحششوا وازاي حلاوة الحشيش ساعتها وانهم لولا التعميرة كانت جامدة والليلة كانت مشعللة ماكانوش لهفتهم وعميتهم عن روئيا سيدنا محمد وهو خارج من منزله مهاجرا.
بجد كلامه عن الغرز والحشيش كثيف جدا وبوصف شديد التميز والرقي, وده الجمال في الموضوع والحاجة اللي بتدفعك دفعا لمعرفة ليه كل ده. ,,,,, اصل الموضوع بالطريقة دي اصبح يغوي بجد, الحقيقة بعد فترة كده اكتشفت حاجة غريبة جدا, ان الغرز هي في وقت من الاوقات كانت الاعلام البديل والمتنفس الصريح الخالي من الرقابة على امور لا تطرح بهذا الوضوح او الشفايفية , وان الغرز حتى وان كان كثافة ما يحكيه خيري شلبي مشكوك فيها الا انها تظل عالم سفلي غير حقير بالمرة لنوعيات من البشر تتسم بمصريتها واقرب ماتكون لولاد البلد الجدعان , طبعا حقيقة الغرز امر مشكوك فيه لان خيري شلبي دائما يرى مصر في الغرزة وما بها من تناقضات ودراما متوهجة, ولذا فتصرفات الحشاشين مع بعضهم بهذا النبل ليست في الغرز ولكنها في مصر بعد ان ترفع عن كاهلها التدني الحضاري بالحشيش.

الغرزة والقهوة ليسا متناقضين تماما وبل هم اقرب الى الاخوة , وخيري شلبي يتعامل مع القهوة بطريقة مختلفة ينتفي معاها الجلوس بغرض الشرب او فعل المزاج , فهو ممكن ينتظر واحد على القهوة , او يلعب كوتشينة على القهوة , او يتحدث في العمل على القهوة , انما شرب المزاج او تعلية الدماغ او الكيف مهما كان طريقته ففي الغرزة.

القهاوي الان كالغرز اكثرها اصبح للشرب وليس للعب الكوتشينة او الالتقاء للعمل او مع الاصدقاء , لان زادت عليها الشيشة بانوعها او بالاحرى بنوعيها , فانا اتحدث عن القهوة مش الكافيه شوب, المهم ان وجود الشيشة والمعسل في القهاوي جعلها تتشبه بالغرز مع وجود الاختلاف الطبيعي لطبيعة الهدف من الانصتال والاستكييف , اي فعل الكييف مدفوعا برغبة , في مقولات اخرى يستبدل فعل التكييف بالتأمل , لان القهوة وليست الغرزة بها مساحة من التوحد بناء على رغبتك تقطعها انت باختيارك, تجتمع ايضا مع الغرزة في وجود اصنافا من البشر متعددة تتجمع في محيط ضيق للتكامل والتعاون , القهوة اصبحت الملاذ الطبيعي للناس , رخيصة وبتكييف ومابتصتلش ولا يبتقبض عليهم فيها .

يمكن يجي يوم واتكلم عن القهوة منفردة بس عاندي كم معرفي مكتوب عنها سارجع اليه قبل الخوض في تجربة الكتابة عن القهاوي وازعم اني سافيد, استكمالا لما كتبه كبارنا في هذا المجال كالجبرتي وجمال الغيطاني واخرون لابد للرجوع عليهم قبل الكتابة.