يوم مشهود آخر مطاهرة التحرير 26\7
من اسبوع كنت في اللجنة الداعية لمظاهرة يوم الاربعاء لدعم المقاومة في لبنان وفلسطين .
وكان ...
يوم الثلاثاء اخدت اجازة من الشغل يومي الاربعاء والخميس علشان ماحدش يحس اني في الشغل رايح المظاهرة , رغم اني قايل لكل الناس في كل مكان اني بروح مظاهرات وليا في السياسة . وكنت فاكر في الاول دي حاجة كويسة والناس حاتتقبل الموضوع وكأني واحد كويس او على الاقل شاغل نفسه بحجات كويسة انا عموما ماكنش هممني الموضوع ده اوي لان حبها فعلا اللي مش عارف ايه سببه هو اللي بيحركني بس على الاقل مامكنتش اتوقع ان خطوبتين افسخهم علشان اهل الوانم مش عايزين يجوزوا بنتهم لواحد مجنون ومشغول قال ايه بمصر . اتار في ناس كتير بيقلدوا سيادة المرشد العام للاخوان ان طز في مصر الحقيقة انهم كانوا بيقولوا اكتر من طز في مصر .
بعد ماعرفت اللي فيها وان الناس حاتتقبل كلامي اني واحد اهبل او مجنون بقيت اقول للناس كده واحرص اني اكون الاول وشاطر في كل شئ ومعاملتي للناس تكون مختلفة وكلها اخلاقيات كويسة ونبيلة يمكن تتغير نظرتهم في اللي بيشتغلوا سياسة بس طبعا لا حياة لمن تنادي.
يوم الاربعاء الصح كنت سعيد وحاسس انو يوم جميل جديد. كلمني واحد صاحبي علىالصبح واتفقنا اننا نتقابل بعيد عن المظاهرة وندخل مع بعض .وفعلا اتفقت مع اكتر من واحد على كده خلال اليوم. فتحت الجرايد الصبح لقيت تصريح من جمال مبارك بيقول انو مع المظاهرات السليمة ففهمت اللي فيها
جمال حايطلع بمظاهرة وخفت ليطلع معانا النهاردة بس على الاقل فهمت ان الدنيا حاتكون حلوة واخواتنا الحلوين حايكونوا كويسين . وبعدين فكرت في اخواتنا التنيين المسلمين – يعني احنا الكفرة طبعا- وبرضضو اتمنيت من ربنا اني ماشفشي وشهم النهاردة لعدة اسباب اولهم مابحبش اطلع مظاهرة مع شوية فراخ بيقعدوا في الجوامع لعمل مكلمات علشان كل واحد يطلعلوا كلمتين, وكمان علشان كنت عايز اعرف احنا عددنا حايكون كام بالزبط من غير الحشد المزيف بتاع الطاعة والايجاب . كنت عايز اعرف احنا كلنا كحركات سياسية حايقدروا يعملوا ايه. ونجمع كام ؟
المهم على العصر عرفت من شوية تليفونات ان الموضوع حايكون عددا كويس وقلت ربنا يسهل.
وانا بلبس هدومي بعد الدش التمام . جيت البس لباس – كلوت يعني – قلت بلاش البسه ملون او رمادي علشان لو حصل فيا زي محمد الشرقاوي صحبي وحبيبي ميقعدوش يتريقوا حبقى مبضون اوي لما يسيبوا كل العنف والمهانة دي ويعلقوا على اللباس ولاد الهبلة فلبستوا ابيض وبعدين قلت خلي الهدوم كلها بيضاء علشان من اول يوم احسس المساجين اني سجين سياسي علشان ماحدش يقل عقله منهم .
لبست ونزلت وانا في الطريق فكرت هي حاتكون فين وهل حانمشي ولا لأ وايه الهدف منها بالزبط ودي كلها افكار كلها كانت في دماي ومعرفتش اناقشها في الاجتماعات التحضيرية اللي كلها مزايدات ومناقشات بيزنطية , وبعدين جاتلي فكرة حلوة اوي ليه بقى مانعملش المظاهرات بتاعتنا بعد كده ويكون فيها مغني او فرق للغني والاناشيد . حانكون فكرة حلوة , وانا بافكر فيها افتكرت محمد نوح وهو بيغني مدد مدد شدي حيلك يا بلد واغاني الشيخ امام وقد ايه الاغاني دي بتعمل جو كويس في تحميس الشباب والناس وازي ممكن اعداد من الناس تيجي علينا لما تلاقي الموضوع اكثر انسانية.
وصلت الى مكان انتظار الاصدقاء ....مش حاطول جم وتوجهنا الى الميدان... الحركة الي حد كبير عادية, وبعدين ظهر المتظاهرين... ماشي العدد كويس بالنسبة للساعة 6 يعني بداية المظاهرة ......
نتوقف هنا ولنا تكملة عن الملاحظات داخل المظاهرة.

قال مظاهرة في الازهر قال....
رحت يوم الجمعة اللي فاتت اصلي في الازهر واحضر مظاهرة التضامن مع فلسطين واللي بيحصل فيها .
وياريتني ماروحت ولا وقفت في الحر ولا دفعت الخمسة جنيه علشان الركنة وخلتني في بيتنا ولبست البواب بتاعنا لبس الامن المركزي وماخلتيش حد يعدي من قدام البيت برضو وقعدت قدام ابويا يقول كلمتين عن فلسطين واننا حانعمل ونسوي وخليت امي تهتف كلمتين اي حاجة وانا قعدت اهتف والم جيراني في اودت الجلوس بتاعتنا والبوابين يقفوا حواليها واهتف اللي في نفسي على الاقل في التكيف ولا المصاريف دي.والنتيجة برضو حاتكون واحدة واطلع نفس الشحنة اللي عاندي من التعاطف مع الفلسطينين في غزة .
مش هما عملوا كده يومها اول مالشيخ خلص الخطبة قاعدوا يهتفوا ويقول كلمتين حلوين وبعدين خرجوا في سلام آمنين قال ايه عملوا مؤتمر.
اللي انا كنت متوقعوا وفاهموا ان الناس اللي راحت بغض النظر انهم قطيع الاخوان المسليمن (فينك يا استاذ خسن تلم ناسك اللي فرطوا من بعدك ) انهي يمعلموا مظاهرة حاشدة مع البقية من الناس اللي عايزة وحسه بالمصيبة ويطلعوا بره ويمشوا امام كل الناس ليعلنوا اي انبطاح وصلنا في مساندة اهم قضية عايشين فيها وبيها . ولا انهم يتلموا في صحن الجامع علشان يطلعوا الشحنات الزيادة .انا كدهكنت افتخر واقول انا انضربت و طلع ميتيني علشان حاجة تستاهل .على العموم لسه بدري اوي يا ناس قدمها كتير لحد ماتكون من دم ولحم.

الغسيل اللي لاموأخذة وسخ

فجأة كدة طلع علينا قسيس جديداسمه مكسيموس احنا كمسلمين مانسمعش عنه حاجة. القسيس الجديد ده ابتدى ينشر غسيل الكنيسة الارثوذوسكية في مصر. الحقيقة انو نشر الغسيل الللي لاموؤخذة وسخ للبابا. بصوا انا ماعرفش ايه قدسية البابا خصوصا اننا كمسلمين ماعندناش حد مقدس ومرفوع عنه الخطأ او النقد الا الرسول فانا ماعرفش ايه الموضوع ده. بس المهم الراجل ابتدى يقول كلام عن البابا كان معروف مسبقا عند المسؤلين في الدولة وعند ناس تانية عالمة ببواطن الامور. الكلام بقى اللي قالوا ان البابا كان حريص انو يزود الفتنة الطائفية في مصر وده معروف من السبعينات بس انو يتقال علني (في المصري اليوم بتاريخ 2\7\2006 ) هو ده من الهدوم اللي وسخة وحانبتدي نسمع عنها تباعا وان البابا كان بيعمل ويسوي للمعارضين بتوعه واللي بيخالفه في الراي برضو كان حاجة معروفة بس برضو انها تطلع من واحد كان لفترة صغيرة جوه الكنيسة فهي دي المشكلة.
حتة لو الراجل الجديد ده كان عاندو مشاكل او عايز ينشق (فكرني بشلة الوسط اللي قال ايه انشقت عن الاخوان ) حاكم الانشقاقات في مصر بقت حوسة.بس اللي قالو كلام يوجع المحايد االي ماسمعش عن الماضيع دي قبل كده.
المهم كمان ان الرجل الجديد ده مش اوي يعني وبيقول كلام غريب عن الشعب القبطي في مصر فكرني كده وكانه عايز يعمل جمهورية زفت او زفتى مش عارف, وان لا امل في الاصلاح – مش عارف هو بيتكلم عن الاصلاح في مصر ولا في الكنيسة ولا الشعب القبطي – الا من الخارج والادهى ان بيعترف ان اللي عايز يعمله ده مدعوم من امريكا. لامؤخذة ده كلام..... ده حتى البابا كان بيعمل من غير مايقول طب تخيلوا ده بيقول يبقى عمل ايه . البلاد دي فعلا مابقاش فيها كبيرولا حد يفهم الناس ايه الغلط وايه الصح ومين ده علشان يقول الكلام ده..... .
ربنا يهدي الكل ويحاولوا يقروا دافنشي كود او يتفرجو عليها يمكن ينشغلوا باللي اتقال اكتر من نشر الغسيل كده على الملأ .