(الموعلمة)
طبعا المفروض ان الكلمة تتكتب بطريقة تانية من غير واو واحط عليها ضمة, بس انا قاصد علشان ماحدش يجي في دماغه معلمة يعني مذكر معلم اللي بنشوفه في القهوة او في السوق مثلا... يعني مش اللي بنشوفه في المدرسة.
طبعا انا المفروض اكتب الصح بغض النظر عن الناس حاتفتكر ايه,,, بس الحقيقة انا مارضتيش اخلي فيه اي افكار مرتبكة عن الشخصية اللي حاتكلم عليها,,,
لان الدكتورة منار الشوربجي دكتور السياسة والاقتصاد في الجامعة الامريكية اخر واحدة تقدر ترتبك بينها وبين المعلمات , الدكتورة كلاس جدا ورقيقة جدا جدا وحاجة كده مش موجودة,
انا عادة مش من الناس اللي بتتقبل ان يكون لها معلم, مش كبر ولا غرور انما قناعتي بالجيل القديم او اللي اكبر مني قناعة مجروحة لاسباب مالناش دعوة بيها دلوقتي. علشان كده انا اساتذتي وموعلميني قليلين, بس الحقيقة رغم انهم قليلين بس ماحدش يقدر يقول عليهم تلت التلاتة كام. افكار وعلم وشخصية ,
وفحياتي ماليش معلمات او قدوات نسائية, يمكن علشان طبيعتي كولد وكمان هم مش كتير اوي . الا الام الروحية اللي شملاني بكل شي رغم اننا مش بنتواجد كتير مع بعض, امي الروحية دي حاجة تانية خالص وكانت كل مساحة التقدير للنساء في حياتي ملياها, واكيد حاتفضل كده على طول, بس دي امي الروحية,دكتورة منار بقى دي اللي حاجة تانية.
يعني انا كتير باسمع مثلا عن العلاقات الامريكية والسياسة الامريكية بس لما تسمع من الدكتورة منار دي حاجة تانية خالص, يعني مهما حاولت اني افهم خصوصا لما رجعت من امريكا واتعاملت مع الناس هناك وحبيت اعيش في دور الواحد اللي فاهم حاجة وحضرت مؤتمرات , وقريت كتب عن امريكا واللي لازي منه,وبقيت بقى اقعد مع اي حد واعيش في دور الواد اللي فاهم, والواد اللي ممكن يحلل ليه امريكا وازاي وبتعمل كده ليه, الحقيقة اني كنت فاهم ونقلت فعلا افكار كويسة للناس اللي حواليه, ورحت للدكتورة منار اتناقش معاها (واخدين بالكوا اتناقش معاها ) يعني راس براس بقى, روحت للدكتورة, وطلعت كل اللي عاندي من كلام قال يعني فاهم بقى, وقال يعني بافهم, وبعد ماخلصت كل حاجة راحت الدكتورة بكل هدوء, قالتي لا الموضوع مش كده الموضوع واحد اتنين تلاتة, بس اللي بسطتني انها زودت المعرفة اللي عاندي كتير , يعني كبرت دماغي درجات ,زودت المعرفة بطريقة سلسة جدا , وهي دي احسن طريقة في التعليم, هات كل اللي عاندك وبعدين ازودك انا درجة زيادة,
انا مش حاتكلم كتير عن امثلةحصلت مع الدكتورة قبل كده , بس انا حانقل اخر درس اتعلمته من الدكتورة, لاني لو نقلت الدروس اللي فاتت حاتكلم كتير خصوصا انها دروس سياسية خاصة بطريقة معرفتي عن المجتمع والسياسة الامريكة,
انما اخر درس انا اتعلمته من دكتورة ماكنش مباشر ليا لوحدي انما منقول من جرنان المصري اليوم عدد يوم الاربعاء 23 \4 بخصوص الرئيس القادم لامريكا, الحقيقة ان المقالة كانت بتعقد مقارنة بين كارتر واوباما , بس انا ماهمنيش المقارنة بقدر ماهمني جملة قالتها القت الضوء عن موضوع مهم اوي في الانتخابات والرئاسة في امريكا ..
"الامل ليس في الواقع في اوباما نفسه وانما في الحركة السياسية الداعمة لترشيحه. فهي اكثر تقدمية منه وهي اذا ماظلت حية, القادرة على دفعه عند فوزه لاتخاذ مواقف اكثر ايجابية." بغض النظر عن الانتخابات وبغض النظر عن مين اللي حايكسب الانتخابات بس اللي الدرس الجديد اللي انا اتعلمته ان فيه حاجة اسمها حركات سياسية داعمة , وهي دي اللي بتأثر في التوجهات الامريكية عموما , خلينا فاهمين ان فيه فرق بين الحركات واللوبي, يعني الحركات الامريكية حاجة واللوبيهات حاجة تانية,يعني شعار اوباما بخصوص التغير مش مجرد شعار ده حركة في المجتمع الامريكي كله ومن واجبنا (طبعا بعد مافات الاوان) اننا نشتغل عليها.
الدرس التاني ان فيه امل احنا مش شايفنه والدكتورة منار بتوضح لنا ازاي الامل احنا حاسينه بش مش عارفين ازاي نمسكه بادينا ......
مدرسة يا دكتور منار اكاديمة كاملة مش مدرسة بس .