ساكن في مكان واماكن تانية ساكنة في

تحبوا تسمعو الحكاية
لازم تسمعوا الحكاية من الاول
قدري الجميل الرئع – انا باحب اقول الكلمة دي (رائع) – وبحب كمان الحتة اللي ساكن فيها لانها بين كل حاجة
مش في وسط كل حاجة ...
يعني انا مش عايش للاسف في وسط البلد.......... انا عايش في ارض الجولف
يعني لا مصر الجديدة ولا مدينة نصر
يعني 5 دقايق من المقطم اوسع مشهد للقاهرة اللي مسميها مصر من فوق....... وبعدين خدوا مني الاسم لما عملوا مدينة جديدة......يعني الكورنيش بتاعو وايمن ومهندس حسام..... وطولوا وعرضوا والكلام اللي بيحصل فيه... وايام الشقاوة ربنا مايعدها والطلوع والنزول .....يعني احسن حاجة فحياتي كانت ممكن تحصل فيه بس ربنا يجازي اللي كان السبب.............

ودقيقتيني من الكربة اروع حتة في مصر واكتر حتة باحب اتمشي فيها بدون سبب وباحس ان شوارعها بتقولي كلام وبتديني كلام كتير .......وباحس دايما ان كل يوم فيها مغامرة جديدة... واللي فيها قهوة اسوان وعمارات مصر من مية سنة وبتاع الجرايد اللي دايما يصبح عليك بالفرنساوي رغم اننا 2 صباحا .........

وربع ساعة من وسط البلد بكل مافيها من عبل وعسل وشهد ودموع ........وسط البلد يعني الشرقاوي والبورصة والمظاهرات وقهوة عم ابو احمد اللي بيتر مسميها التكعيبة والتاون هاوس وطلعت حرب ومدبولي وفندق التوليب وافتر ايت واليوناني ومحمد هاشم وكتب ميريت اللي عاملة زي وسط البلد صغيرة وغريبة وحلوة .....الحقيقة بعدد مرات نزولي لوسط البلد كنت دايما حريص ان ادوق من كل مكان قطمة00000

وعشر دقايق من الحسين يعني زيزو النتن وتخريمة سوق اللمون وشارع المعز لحد الركنة والتمشية لحد ولي النعم وشيشة شبرا وتهريج عم شحتة.. تخيلوا مدرس تاريخ بقه وكيل مدرسة دلوقت باسم الله ماشاء الله.. وبعدين بيشتغل في قهوة... بس ايه والله راجل ميه ميه... ولا لما يهرجوا التهريج التقيل بتاع الحركات اللي موش تمام مع بعض .....الحسين يعني لما يناديك من جواك وتلبي.....يعني القرف بتاع العرب وحركاتهم الوس.. يعني ايه ولا ايه ولا ايه...

يعني نص ساعة من الزمالك .......ياااااااااع على الزمالك اللي ماكنتش حاعتبها الا علشان منظر النيل والساقية........يعني الحبيبة الالفرنكةوالعومات واول سيلانترواوالناس اللي بتحب الزمالك وانا لأ000000

وساعة من الهرم لو في الزحمة او تلت ساعة لو رجعت في معادي واحدة ونص الصبح ........بقلك الهرم يعني فيصل والزحمة يعني الهرم وبناته اللي لامؤاخذة مشيين مشي بطال وفكل كباريه قاعدين ومش ساكنين فيه............. يعني ماتروحش الا لما تعوز حاجة او توصل حد – انا يقى كان في حد مهم اوي بوصله وبعدين في حد تاني اقل اهمية وبعيدن بقى فيه حد تالت لحد ماحلفت انا مش عايز اروح هناك تاني بس تقول ايه ضعيف ....

وعشرين دقيقة من عاند الاوتستراد وتيقى فين ؟؟؟؟؟؟؟ في المعادي يعني ناس خاصة كده لازم تروحلهم و انت متشيك وحاطط كلونيا علشان هناك وائل ومراته واحمد وشركات البترول والفلل والعربيات الفشيخة و بس هي كده لا تحبها ولا ماتحبهاش مش بتاعتنا اصلان........... عرفتوا انا ساكن فين ....
دي بداية الحكاية .......المرة اللي جاية في النهاية
لما فتحوا السهر