اعتذار واجب

ياااااااه قد ايه بقيت باكره الصيف
كنت وانا في الكلية باحب الصيف لا وكمان كنت باحب الحر, لا وكنت باعتبر ان الحر احد الطقوس تدريب النفس والجسد على الاحتمال زي اليوجا وعوالم بوذا, دلوقت بقيت باكرهه وبقالي سنتين تلاتة مابحبوش يجي و الغريبة ده مش علشان الحر والعرق والضيق في التنفس ابدا, ده بخصوص حاجة تانية خالص انا بقيت احس ان الصيف ماليش سكة فيه ومش بتاعي. بقى للناس التانية الناس الاشباح اللي دايما بتتشاف من ورا زاز, الغريب في الموضوع اني من فترة كنت باعتبر نفسي واحد منهم,لاني كنت ساكن معاهم, وفعلا حاولت كتير ان انسجم معاهم, واعتبرت ان الفترة دي اللي في بداية حياتي كشاب فترة اختبار على ارتياحي حايكون فين. يعني حاكون مع الاشباح اللي فو ق ولا اخليني مع الاشباح اللي تحت, وبين دول ودول انا بقيت, عين في النار والعين التانية ف يانار.. دايما لما باروح هناك (العجمي وشاطئ الفردوس ) كنت بحس اني بعيد عن الناس دول رغم اني عايش بينهم, الناس بتوع البيكيني ومشتقاته من شواطئ خاصة وحفلات بدعاوي وسكر ورقص و....انا مش باكتب هنا علشان انتقدهم انا عايز اعرفكم مين الناس دول اللي انا ماكنتش بانسجم معاهم, وكنت كل صيف بارحوح هناك اخدلي جانب واقعد اقري في اي قصة ولما كنت باقرب من حياتهم كانت بتجيلي حالة اكتئاب كبيرة اوي لاني بحس اني مش من الناس دي,,,
على العموم ارتبط الصيف عاندي بالحالة دي ..بس المشكلة التانية اللي ان واجهتها اني لازم اصيف, لازم اغير, طب حاعمل ايه وانا اللي عارف اهمية التغيير ....وهي دي بقى الدايرة اللي كنت باقع فيها كل مرة, وكل مرة لحد ماكرهت الصيف بالفراغ وفضى الوقت بتاعه, والناس اللي بتاخد اجازة من الاجازة, لاني دايما مش بلاقي حد يقضي معايا اجازة زي مانا عايزها .
كل المقدمة دي علشان اعتذر للي مهتم يقرا مدونتي .......انا فعلا رجعت من امريكا مريت بفترة عدم توازن اظن كتبت عليها وبعدين دخلت في الصيف وبعدين مريت بمحاولة جواز هبلة طحن – واضح ان الواحد كبر- وبعدين ترتيب للبرنامج الصيفي للحزب وبعدين تغير شغلي وبعدين محاولة جواز تانية بس احسن شوية ........وفجاءة ..............................لا شيئ ................سكون تام.
حالة من السكون غير الطبيعية بالمرة ..........
صيف... مع اكتئاب... مع خمول تام..... مع احساس بالفشل فظيع مرعب .......مع شغل سئ روتيني ملئ بالمشاكل الشخصية..............مع مشاكل شخصية في الحزب مع حاجات تانية في اماكن تانية مابحبش اشكي منها.......ادي الامرفي النهاية الى هذا الوضع
زهق من كل شئ وقرف وعدم وجود طاقة لأي حاجة تتعمل وقعدة مستديمة فالبيت وكسل حتى انك تعدي الناحية من النيل. والحاجات المطلوبة منك تعملها وتنام............ ثم تستمر حالة نومك في البيت لساعات طوال...........
بجد حاولت كتير ارجع تاني وكنت حارجع فعلا بعد ماقريت قصة خيري شلبي "نسف الادمغة" بس واضح ان ثقل الصيف على قلبي كان اقوى .....والنهاردة وقبل ما اسافر تاني انتشيت بحاجة غريبة جدا كانت كفيلة قبل كده انها تدخلني في متاهة اكتئاب حاد .وهو ده الموضوع اللي جاي المهم اللي خلاني ارجع اكتب تاني...
شكرا واسف